Wat mécht en Ingenieur?

De Begrëff Ingenieur kënnt aus dem Mëttelalter an staamt vum laténgesche Wuert “ingenium” of, wat esou vill wéi “produktive Geescht” bedeit. Den Ingenieur haut ass en Erfinder an e Problemléiser. An sengem Beruff muss den Ingenieur Léisungen zu Problemer technescher Natur fannen déi him gestallt ginn. Dobäi muss den Ingenieur oft “ëm den Eck” denken a kreativ sinn. Fir d‘Problemer ze léise benotzt den Ingenieur d‘Mathematik a physikalesch Gesetzer. Hautdesdaags kann den Ingenieur ganz oft schonn op Technologien a Methoden zréckgräifen déi aner Ingenieure virun him schonn entdeckt oder entwéckelt hunn. Deemno muss den Ingenieur haut oft déi al Technologien a Methode verbesseren oder se dem Problem deen sech him grad stellt upassen. Et ass wichteg dass en Ingenieur zum Asaz kënnt, ier ee Produit oder ee Projet agesat oder fäerdeggestallt gëtt, well hie capabel ass de Realfall scho virun dem Abetribhuele bzw. Bauen ze berechne bzw duerzestellen. Sou gëtt verhënnert, dass de Projet oder de Produit en Desaster ginn.

Wéi kann ech Ingenieur ginn?

Fir kënnen Ingenieur ze ginn, muss ee studéieren. Nom Studium ass een dann e Bachelor/Master of Science wann een op enger Universitéit oder enger technescher Héichschoul säin Ofschloss mécht oder e Bachelor/Master of Engineering wann een den Ofschloss op enger Fachhéichschoul mécht. (Fréier huet den nämmlechten Ofschloss Diplom Ingenieur geheescht).

Wat léieren ech an deem Studium?

Den Ingenieur muss virun allem ee Wëssen an der Mathematik an an der Physik hunn, dofir gëtt am Studium dorops ee grousse Wäert geluecht. Dëst ass fir all Ingenieur dat wichtegst a gëtt dofir och an all Studiegang geléiert. Bal genau sou wichteg ass et dono Methoden, Theorien an aner fachspezifesch Kompetenze bäibruecht ze kréien. Dës Kompetenze si vum Ingenieursberäich ofhängeg mee als gemeinsam Basis hu se all ee wëssenschaftlechen Hannergrond. Si sinn dofir do, dass den Ingenieur seng Aarbecht dono méi effizient ka maachen, well hie weess wéi en sech am Beschten uleet fir déi gestallten Aufgab ze léisen.

Wéieng Ingenieure ginn et?

Et gëtt vill verschidden Ingenieuren. Dëst sinn awer oft nëmmen extra Nimm fir net ganz sou extra Kompetenzen. Déi meescht Ingenieuren hunn eng vun den 3 grousse Richtunge Maschinnebau, Bauingenieur an Elektroingenieur studéiert an sech da während hirem Studium an déi Richtung spezialiséiert.

Den Ingenieur an der Praxis

Ingenieuren, an och déi déi et net onbedéngt am Numm stoen hunn, si relativ villfälteg asetzbar. Et ginn zum Beispill ëmmer méi Ingenieuren op Banken, Assurancen, Consultingfirmen oder och beim Staat oder de Gemenge gesicht. Doduerch dass eis Welt ëmmer méi komplex Technik benotzt an en demographesche Wandel stattfënnt gesinn d’Beruffschance fir d’Zukunft positiv aus. Eng aner interessant Saach ass dass ee grad a grousse Betriber als Ingenieur och aner Beräicher, wéi zum Beispill Marketing oder Controlling, zougetraut kritt, woubäi dëst ëmgedréint fir den Economist net sou einfach ass.

Wéi eng Décisioune muss ech also elo huelen?

Niewent der Auswiel vun der Stad (jee no Land staark ofwäichend Studienorganisatiounen) an dem Fach (am beschte mat klenge Stagen virum Studium ofsécheren) sollt ee sech och mat der Fro beschäftegen, ob een op eng Universitéit oder eng Fachhéichschoul well studéiere goen. Dës Begrëffer si leider net ëmmer kloer definéiert, sou dass ee grad a franséischsproochege Länner méi genau muss kucke wat elo wat ass (d’Uni Lëtzebuerg ënnerscheet hei z.B. zwëschent académique a professionel). Bei der Bezeechnung vum Ofschloss kann een oft och en Ënnerscheed feststellen, deemno ob et Bachelor/Master of Science (meeschtens Uni) oder –Engineering (meeschtens FH) ass.

Uni oder Héichschoul?

Et besteet en Niveau- an deelweis och e Viraussetzungsënnerscheed zwëschent Uni an Héichschoul, souwuel bei der Vitesse vun de Coursen, dem Opbau vum Cours, den Übungen, dem Selbststudium an och an den Examen. Dobäi ass de behandelte Stoff meeschtens ähnlech; et gëtt dem Student just op eng aner Aart a Weis bäibruecht. Op enger Uni huet ee prinzipiell manner Coursen a méi Selbststudium (et muss een sech also Villes selwer bäibréngen). Ausserdeem ass et op der Uni keng Seelenheet zu e puer Honnert an engem Cours ze sëtzen, woubäi dëst op den Héichschoulen meeschtens méi kleng Gruppe sinn a soumat d’Betreiung och méi intensiv ass. Weiderhin ass eng Uni éischter op Grondlaagefuerschung an domat méi theoretesch an zukënfteg ausgeriicht. D’Proffen hu meeschtens e Lehrstuhl mat Mataarbechter fir ze fuerschen. Op den Héichschoulen ass d’Léier éischter méi praxis- respektiv uwendungsorientéiert an aktuell, sou dass hei d’Proffen oft an der Privatwiertschaft schaffen a fir d’Coursen an d’Héichschoul kommen. Et kann ee mat Aschränkungen och während dem Studium wiesselen, woubäi et erop ëmmer méi schwiereg ass wéi erof. Absolventen vu béide Richtungen, also Uni oder FH, ginn ëmmer gebraucht, mee d’Aschaffungszäit ass no der Héichschoul wéinst der Praxisorientéierung awer an der Regel méi kuerz. Vill Entreprise maachen e Carrièresënnerscheed zwëschent deenen zwou Richtungen, awer oft gëtt och kee gemaach an et hänkt ebe vun den individuelle Fäegkeeten of wéi een sech entwéckelt (dës sollt een och am Studium net vernoléissegen, z.B. Softskills). Weider sollt ee sech genau mat de Prüfungsuerdnunge bekannt maachen, well dës kënnen zwëschent de Fächer, de Schoulen a virun allem zwëschent de Länner staark variéieren a séier zu enger Exmatrikulatioun féieren.

Wéieen Ofschloss soll ech maachen?

Méiglech sinn am Normalfall Bachelor, Master an Dokter. Op enger Uni ass de „Regeloofschloss“ ee Master. Wann een dann nach net genuch huet kann ee sech och en Dokter iwwerleeën, dëst ass meeschtens och vun enger FH méiglech. An de Grondlaagefächer wéi Mathé, Physik a Chimie gëtt méi oft promovéiert, well dat an der Fuerschung meeschtens gefrot ass. Heibäi sollt een allerdéngs vill Bëss a Motivatioun hunn. Architekt Bauingenieur Bioingenieur Chemiker Elektroingenieur Emweltingenieur Geometer Informatiker Maschinnebauingenieur Mathematiker Physiker Verfahrenstechniker Wirtschaftsingenieur

Let's engineer edit

De Let's engineer ass eis Broschür fir zukünfteg Ingenieurstudenten. E gëtt all Joer gratis op der Foire de l'Etudiant verdeelt an enthält kuerz a knapp gefaasst déi wichtegt Informatiounen zum Ingenieurstudium a -beruff, sou wéi eng Beschreiwung vun deene wichtegste Studiegäng.

Wann s du de Let's engineer wëlls geschéckt kréien, da so eis Bescheed.

Studieninfos am Internet edit

Hei e puer Adressen, déi iech nieft den Informatiounen op dëser Homepage nach weider bei der Studiewahl hëllefen:

  • www.studienwahl.de : "Offizieller Server der Bund-Länder-Komission für Bildungsplanung und Forschungsförderung und Bundesanstalt für Arbeit". Hei fënnt ee bal alles, wat de Studium an Däitschland ugeet: Informatiounen iwwer Fächergruppen an eenzel Studiegäng, Internet-Adresse vun allen Unien, souwéi eng Datebank, wou een sech eraussiche kann, wat ee grad brauch. (z.B. Wou kann ech wat studéieren?). Dës Säit ass wéi et ausgesäit zimlech komplett. Ganz interessant ass och d'Sammlung vun deene ganz neie Studiegäng, déi am Moment op deene verschiddenen Unien ugebuede ginn.
  • www.studieren.de : Eng Internetsäit vu Studente fir Studenten, déi sech mat ville studenteschen Aspekter befaasst.
  • www.letudiant.fr : Hei fënnt een all Informatiounen iwwert de Studium op deene verschiddenen Unien a Frankräich.
  • www.think-ing.de : Eng Homepage fir Ingenieuren an (zukünfteg) Ingenieursstudenten. Hei kann een och gratis eng CD bestellen, déi mat Informatiounen iwwer Ingenieursstudien vollgepaakt ass.
  • www.cedies.public.lu : D'Säit vum CEDIES (Centre de Documentation et d'Information sur l'Enseignement Supérieur). Beim CEDIES kann een awer och laanscht goen a méi spezifesch Froe stellen (211, route d'Esch, L-1471 Luxembourg).
  • www.acel.lu : D'Säit vun der ACEL, dem Daachverband vun de lëtzebuerger Studentecercelen. Hei fannt der och allerfhand wichteg Informatioune ronderëm d'Studéieren. Am Guide du Futur Etudiant (d'Broschür déi d'ACEL all Joer op der Foire de l'Etudiant ausdeelt) fannt der Infoen iwwer d'Studentecercelen an deene verschiddene Stied. Dir fannt op der Homepage awer och nach Infoen vum Studenteliewen an zur Studiewahl.

Op den Internetsäite vun deene verschiddenen Unie fënnt een och allméiglech spezifesch Studieninformatiounen. Déi betreffend www-Adresse fënnt een am einfachsten iwwer Sichmaschinnen um Internet. Et fënnt een z.B. och vill interessant Informatiounen, wann een z.B. "Studieren in..." an esou eng Sichmaschinn agëtt.

Kontakt edit

Information

Association Nationale des Etudiants Ingénieurs Luxembourgeois (ANEIL) a.s.b.l.

Addresse:  6, bd Gr.-Duchesse Charlotte, L-1330 Luxembourg

Tél:  +352 45 13 54

Fax: +352 45 09 32

E-mail:  contact@aneil.lu

Iwwert ANEIL edit

Logo ANEIL

Wat ass d‘ANEIL?

D‘Association Nationale des Étudiants Ingénieurs Luxembougeois, gegrënnt 1958, ass den eenzege Veräin, deen d‘Interesse vum lëtzebuerger Ingenieursstudent vertrëtt. D‘ANEIL representéiert 200-250 Studenten, déi gréisstendeels Maschinnebau,Bauingenieur, Chimie, Biologie, Physik, Elektrotechnik, Informatik, Mathematik an Architektur studéieren an dat a ganz Europa, virun allem an Däitschland an an der Schwäiz awer och an der Belsch, Frankräich, Éisterräich an England.

Wat hunn ech vun der ANEIL?

Als Schüler vun der 2e/1re oder 12e/13e kriss de vun eisInformatiounen iwwert den Ingenieursstudium a -beruff. Déi richteg Informatioun ass nämlech immens wichteg. All Joer wiesselt ee gudde Strapp Studenten d’Fachrichtung oder hält ganz op mat studéiere well se réischt ze spéit erkenne wéi ee Studiegang fir si dee richtegen ass. Do hëllefe mir gäre mat eisen eegenen Erfahrunge weider, schliisslech geet et net dorëms ween am längste studéiert. Och wann d’Studieplatz zweetrangeg ass, gëtt d’ANEIL Tipps fir de Choix vun där richteger Uni oder Héichschoul ze vereinfachen. Mir organiséieren dofir iwwert d‘Joer verdeelt eng Rei Schoulaktiounen, wou mir a verschiddene Lycéeën dech als Schüler direkt informéieren, an och op der Foire de l‘Étudiant hu mir eisen traditionelle grousse Stand. Mir vermëttelen dech och gären un ee vun eise Memberen, dee grad an dem entspriechende Studium steet.

Als Ingenieursstudent kanns du un eise Visite bei lëtzebuergesche Firmen deelhuele fir der en éischt Bild vun der Praxis ze maachen, a fir Studente vun aneren Héichschoulen ze begéinen. Am Hierscht organiséiere mir all Joer eng Rees vun e puer Deeg an d‘Ausland, wou mir eise Memberen d‘Méiglechkeet ginn, enger Visite mat souwuel techneschem wéi och kulturellem Inhalt eng Stad oder Regioun kennenzeléiren. Di läscht Jore ware mir z.Bsp. zu Barcelona, Dublin, Prag, Hamburg, Mailand, Ostküst vun den USA an am Ruhrgebiet. Véier mol am Joer kriss du eis Zäitschrëft, de bulli, op deng Lëtzebuerger Adress geschéckt a mir leeden der all Job- a Stageoffer déi mer vun den de Firme kréien un deng Email Adress weider. Net ze vergiessen ass eise Fräibéier wou sech eemol am Joer bis zu 100 Ingenieursstudenten treffen a sech amuséieren.

Nom Diplom hues du duerch déng Visite mat der ANEIL een differenzéiert Bild vun dénge Méiglechkeeten als Ingenieur zu Lëtzebuerg. Eis Table Ronde op Karfreideg bitt eng gutt Geleeënheet, an engem ongezwongene Kader mat de Personalcheffe vun deene wichtegste lëtzebuerger Entreprisë Kontakt opzehuelen an eventuell en éischte Rendezvous ze fixéieren.

Weider Informatiounen: www.aneil.lu

aneil